Body of Lies - நம்பிக்கையின் மறுபக்கம்...

Ridley Scott இயக்கத்தில் 2008 இல் வெளிவந்த இந்தப்படம், ஒரு மதத் தீவிரவாதியினை பிடிக்க முயலும் மூன்று உளவுத்துறை அதிகாரிகள் பற்றியது.

ரோஜெர் பெர்ரிஸ்(Roger Ferris) ஈராக்கில் தீவிரவாதிகளை வேட்டையாடும் ஒரு CIA அதிகாரி.அவனுடைய முக்கிய குறி, அல் சலீம்(Al-Saleem) எனப்படும் ஒரு மதத் தீவிரவாதி. ஒரு நாள், தனது உயிரைக் காப்பாற்றிக்கொள்ள அல் சலீம் பற்றிய ரகசியங்களை பகிரத் தயாராயிருக்கும் நசிர் என்னும் தீவிரவாதியை சந்திக்கும் ரோஜெர் அவன் மூலம் கிடைக்கும் தகவல்களைக் கொண்டு ஜோர்டானில் இருக்கும் ஒரு ரகசியமான தீவிரவாத முகாமை கண்டுபிடிக்கிறான்.

ஜோர்டான் உளவுத்துறை தலைவர் ஹானி சலாமை (Hani Salaam) சந்திக்கும் ரோஜெர், அவனது உதவியோடு ஜோர்டானில் இருக்கும் சலீமின் ரகசிய முகாமை கண்காணிக்கவும், பின்னர் சலீமை பிடிக்கவும் திட்டமிடுகிறான். ஆனால், ரோஜெரின் மேலதிகாரி எட் ஹாஃப்மனுக்கு அது போதுமானதாயில்லை. ரோஜெருக்கு தெரியாமலேயே அவனுடன் பணிபுரியும் வேறொரு அதிகாரியின் துணைகொண்டு வேறொரு யுக்தியை கையாண்டு அம்முகாமுக்குள் ஒரு உளவாளியை அனுப்ப திட்டமிடுகிறான். ஆனால்,திட்டம் தோல்வியடைவது மட்டுமில்லாது தீவிரவாதிகளுக்கு தாங்கள் கண்காணிக்கப்படுவது தெரிந்துபோகக் கூடிய சூழ்நிலை உண்டாகிறது. இதனை ஹானியின் உதவியோடு தடுக்கும் ரோஜெர், இம்மாதிரியான காரியங்களை தனக்குத் தெரியாமல் எட் செய்வது குறித்து அவனுடன் சண்டை போடுகிறான். ஒரு நாள் மருத்துவமனை செல்லும் ரோஜெர் அங்கே ஆயிஷா (Golshifteh Farahani) என்னும் நர்சை கண்டு அவள் மேல் காதல் கொள்கிறான்.

இதற்கிடையே, கண்காணிப்பின் போது எடுக்கப் படும் புகைப்படங்களின் மூலம் தீவிரவாத முகாமில் இருக்கும் ஒருவனை(கராமி) அடையாளம் காணும் ஹானி, அவனை தனக்காக உளவு பார்க்க சம்மதிக்க வைக்கிறான். இதனை அறிந்து கொள்ளும் எட், கராமியின் மூலம் அடுத்த வெடிகுண்டு தாக்குதல் எங்கே இருக்குமென அறிந்துகொள்ள ஆசைப்படுகிறான். இது கராமியின் உயிருக்கு ஆபத்தாய் விளையும் என்று மறுக்கும் ஹானி, கராமியை ஏதேனும் பெரிய விஷயத்திற்கு உபயோகப்படுத்த வேண்டும் என்று கூறி மறுத்துவிடுகிறான்.

ஆனால் எட் இதை ஏற்காமல், (மறுபடியும்) ரோஜெருக்கு தெரியாமல், கராமியை கடத்த ஏற்பாடு செய்கிறான். திட்டம் மறுபடியும் தோற்கிறது. கராமி மற்ற தீவிரவாதிகளை உசார்படுத்த அவர்கள் தப்பிச் செல்லுகிறார்கள். எட்டின் இந்த முட்டாள்தனமான காரியத்தால் சலாமியை பிடிக்க முடியாது போனது குறித்து கோபப்படும் ஹானி, எட்டுடன் சேர்ந்து சதி செய்ததாக கூறி ரோஜெரையும் நாட்டைவிட்டு வெளியேற்றுகிறான்.

இதன் பிறகு,வாஷிங்டன் வந்து சேரும் ரோஜெர், சலாமியை பிடிக்க எட்டுடன் சேர்ந்து ஒரு திட்டத்தை வகுக்கிறான். திட்டம் வெற்றி பெற்றதா, சலாமியை பிடிக்க முடிந்ததா,ஹானி ஒத்துழைத்தானா, கராமி என்னவானான் என்பது குறித்து பிந்தைய படம் பேசுகிறது.

படம் இதே பெயரைக் கொண்ட ஒரு நாவலின் படமாக்கமே என்றாலும், நாவலில் முக்கிய பங்கு வகித்த ரொமான்ஸ் இதில் குறைவு என்றே சொல்லப்படுகிறது. அதை மறுக்கவும் முடியாது. ரோஜெர்,ஆயிஷாவிற்கு இடையில் மலரும் காதல் திணிக்கப்பட்டதாகவே இருக்கிறது. எந்த ஒரு காரணமும் இல்லாமல் ஒரு இஸ்லாமியப் பெண்ணை ரோஜெர் காதலிப்பது கிளைமாக்ஸிற்காக திணிக்கப்பட்டதாக தெரிவது ஆச்சர்யமில்லையே. கவனிக்க: நாவலில் முக்கோணக் காதல் எனவும், மூவருமே அமெரிக்கர்கள் என்பதும் குறிப்பிடத்தக்கது.ஆயிஷாவாக நடித்த Golshifteh Farahani நல்ல நடிகையே என்றாலும், அவருக்கு ஒதுக்கப்படும் நேரம் மிகக்குறைவே. 

இப்படத்தில் நல்ல கதையும்,திரைக்கதையும் இருந்தாலும் படத்தை தூக்கி நிறுத்துவது அருமையான நடிகர்கள் தான். மேலும், இப்படம் ஒரு கேரக்டர் ஸ்டடி போல அமைந்திருப்பது நடிப்புத் திறமையைக் காட்டும் வாய்ப்பை அதிகப்படுத்துகிறது. ரோஜெர், எட், ஹானி மூவருமே உளவு வேலை பார்பவர்கள் தான் என்றாலும் எந்த வகையிலும் ஒத்த குணமுடையவர்கள் அல்ல.

ரோஜெர்- The man who finds himself always side-stepped by his superior Ed. கஷ்டப்பட்டு திட்டமிட்டு அதனை செயல்படுத்தி வெற்றியடையப் போகும்போதெல்லாம் எட் போட்ட வேறேதோ ஒரு திட்டம் தன்னுடையதற்கு முட்டுக்கட்டையாவதைக் கண்டு கோபப்படும்,சண்டையிடும், அதற்க்கு மேல் ஏதும் செய்ய முடியாமல் அதை தாங்கிக்கொள்ளும் ஒரு டிபிகல் உளவதிகாரி. களத்தில் கஷ்டப்பட்டு உழைத்து, அதை எட்டின் அவசரக் குடுக்கைத்தனம் கெடுக்கும் போது கோபப்படுவதாகட்டும், பின்னர் ஹானியிடம் எட்டின் திட்டத்திற்கும் தனக்கும் எந்த சம்பந்தமும் இல்லை என்று எடுத்துக்கூறி அவனது நம்பிக்கையை திரும்பப்பெற முயலும்போதாகட்டும், ஆயிஷாவை காதலிக்கும்போதாகட்டும் லியோனார்டோ டி காப்ரியோ திறமையான நடிப்பை வழங்குகிறார்.

அவசரக்குடுக்கை மேலதிகாரியாக ரஸ்ஸல் க்ரோவ். டி காப்ரியோ அளவிற்கு திரையில் வரவில்லையானாலும், டிகாப்ரியோவின் வெறுப்பை மட்டுமல்லாது பார்வையாளனது வெறுப்பை சம்பாதிப்பதில் வெற்றி பெறுகிறார்.எந்த ஆர்ப்பாட்டமும் இன்றி கதாப்பாத்திரத்தோடு பொருந்திப் போன நடிப்பு.

ஜோர்டான் உளவுத்துறை தலைவர் ஹானி சலாமாக மார்க் ஸ்ட்ராங். பெயருக்கேற்றார் போன்றே ஸ்ட்ராங்கான நடிப்பு. சிறிது நேரமே வந்தாலும், டிகாப்ரியோவின் நடிப்பையும் தூக்கி சாப்பிடுகிறார். ஒரு உளவுத்துறை தலைவருக்குண்டான கம்பீரம், திறமை, குள்ளநரித்தனம், திமிர் என் அனைத்தையும் வெகு எளிதில் கண்முன் நிறுத்துகிறார். இவரது ஆரம்ப காட்சியில் ஆரம்பிக்கும் கம்பீரமான நடிப்பு கடைசி காட்சியின் கேலி வரையிலும் நிறைந்து நிற்கிறது. ரோஜெர் பொய் சொன்னான் என்ற கோபத்தில் உதவ மறுக்கும்போது, ரோஜெரை முதன் முதல் சந்திக்கும் போதும், தீவிரவாதி ஒருவனை கடத்தி அவனை கொல்லப்போவதாய் காட்டிக்கொண்டு, தனது சாமர்தியத்தாலும், குள்ளநரித்தனத்தாலும் அவனை மாற்றி தன்பக்கம் திருப்பும்போதும் இவரது பண்பட்ட நடிப்பு ஜொலிக்கிறது.Screen presence எளிதாக வந்துவிடுவதில்லை.ஆனால்,இவருக்கு வருகிறது. மேலும், சில ஷார்ப்பான வசனங்கள் இந்த கதாப்பாத்திரத்தை மேலும் தூக்கி நிறுத்துகிறது.

Roger: I thought you didn’t believe in toture Hani Pasha.

Hani: This is Punishment, my dear. It’s a very different thing.

Hani to Ed: You Americans, you are incapable of secrecy because you are a democracy. Real intelligence operations, they remain secret forever.

இப்படத்தில் குறிப்பிட்டு சொல்லக் கூடிய விஷயம் ஒன்று உண்டென்றால், அது உளவுத்தொழிலின் அசிங்கங்களையும், துரோகங்களையும் வெளிப்படையாகச் சொன்னதேயாகும். மூன்று முக்கிய உளவுத்துறை நிபுணர்கள் இணைந்து ஒரு பணியில் ஈடுபடும்போதும் கூட பொய்யும், நம்பிக்கைதுரோகமும், அவசரக் குடுக்கைத்தனமும், தன் லாபத்திற்காக அடுத்தவரை உபயோகிப்பதுமே மிஞ்சுகிறது. நம்பிக்கையின் அடிப்படையில் செய்யப்படும் உளவுத் தொழிலின் மறுப்பக்கம் இருப்பது பொய்யும், சுயலாபமுமே!

Rating: 7.5/10.

Note: பல நாட்கள் கழித்து ஒரு போஸ்ட்,அதிலும் (மாதங்களுக்கு பிறகு) ஒரு சினிமா போஸ்ட். Well,It’s good to be back. :)