The A team - அதிரடி டீம்….

     

நண்பர்களே! இந்த முறை The A team என்ற படத்தைப் பற்றி பார்க்கப் போகிறோம்.இந்த வருடத்தின் ஜூன் மாதத்தில் வெளியிடப்பட்ட இந்தப் படமானது,எண்பதுகளின் மத்தியில் ஒளிபரப்பப் பட்ட, இதே பெயரைக் கொண்ட ஒரு டிவி சீரியலை அடிப்படையாகக் கொண்டு உருவாக்கப்பட்டது.

மெக்ஸிகோவில் உள்ள ஒரு ஜெனரலை உளவு பார்க்கச் சென்று,அங்கே மாட்டிக்கொண்ட, தன்னுடைய சகாவும், தனக்குக் கீழ் ரேஞ்சர் பிரிவில் வேலை பார்க்கும் Face எனப்படும் Templeton “Face” Peck ஐ விடுவிக்க செல்லும் Captain John “Hannibal” Smith உம்,மாட்டிக்கொள்வதில் ஆரம்பிக்கிறது படம்.

அதன் பின்னர் அங்கிருந்து தப்பும் ஹன்னிபல்,போகும் வழியில் தான் சந்திக்கும் Bosco B.A. Baracus எனப்படும் இன்னொரு ரேஞ்சரை சந்திப்பதும்,அவனை தன் படைப் பிரிவின் கீழ் சேர்த்துக் கொண்டு Face ஐ விடுவிப்பதும்,திறமையான அதே நேரம் அரைக் கிறுக்கான ஹெலிகோப்டர் பைலட்டான H.M. "Howling Mad" Murdock உதவி கொண்டு தப்புவதும் என்று விரிகிறது படம்.

பின்னர்,இந்த நால்வரும் சேர்ந்து அமைக்கும் கூட்டணியே The A team என்று சுருக்கமாக அழைக்கப்படும் The Alpha team.எட்டு வருடங்கள் கழித்து, பாக்தாத் நகரில் இவர்கள் நிலை கொண்டு இருக்கும் போது,CIA நிறுவனத்தின் ஏஜென்ட்டான,லிஞ்ச் எனப்படுபவன் ஒருவன், ஹன்னிபலை சந்தித்து,தனக்காக ஒரு பணியினை செய்யுமாறு கேட்டுக் கொள்கிறான்.

‘முன்னாள்’ சதாம்மின் ஆதரவாளர்கள் சிலர் சேர்ந்து,முப்பதே மணி நேரத்தில் கடத்தப் போகும் பில்லியன் டாலர் மதிப்பிலான கள்ளப் பணத்தையும்,அதனை உருவாக்கப் பயன்பட்ட,அமெரிக்காவின் கைகளில் இருந்து போரில் திருடப்பட்ட, டாலர் தகடுகளையும் கைபற்ற வேண்டும் என்று கேட்டுக் கொள்கிறான்.

இதனை தன்னுடைய நண்பனும்,தன்னுடைய உயர் அதிகாரியுமான ஜெனரல் மோரிசனிடம் விவாதிக்கிறார் ஹன்னிபல்.இந்தப் பணி ஏற்கனவே The Black Forest என்று அழைக்கப்படும் தனியார் கூலிப் படையினரிடம் ஒப்படைக்கப் பட்டு விட்டதாக சொல்லும் ஜெனரல்,இந்தப் பணியினை ஏற்க வேண்டாம் என்று ஹன்னிபலிடம் கேட்டுக் கொள்ளவும் செய்கிறார்.

ஆனால்,அந்தக் கும்பலின் தலைவன் Pike இன் மேல் நல் அபிப்ராயம் இல்லாத ஹன்னிபல்,இந்தப் பணியினை தன்னால் திறமையாகச் செய்ய முடியும் என்று வாதிடுகிறார்.வேறு வழியில்லாமல்,அரை மனதோடு ஒப்புக் கொள்கிறார் ஜெனரல்.இந்த வேலை எந்தத் தடயமும் இல்லாத வகையில், “Un offical “ ஆக செய்யப்பட வேண்டும் என்று முடிவும் செய்யப்படுகிறது.

வழக்கமாக,அதிரடித் திட்டங்களைத் தீட்டி அதனை நைச்சியமாக செயல்படுத்தும் ஹன்னிபல்,இதற்கும் ஒரு அதிரடித் திட்டத்தை தயார் செய்வது மட்டுமல்லாது,அதனை வெற்றியோடு நிறைவேற்றவும் செய்கிறார்.

ஆனால்,அதற்குப் பிறகு நிகழும் சம்பவங்களால், ஜெனரல் கொல்லப்படுவதும்,அந்த டாலர் தகடுகளை pike அபகரிப்பதும் நடக்கிறது.இவற்றிற்கான பழி இந்நால்வரின் மேல் விழுந்து,இவர்கள் தனித் தனி சிறைகளில் அடைக்கப்படுகிறார்கள்.

ஆறு மாதங்கள் கழித்து லிஞ்ச் உதவியோடு சிறையில் இருந்து தப்பும் இவர்கள்,தங்கள் பெயருக்கு ஏற்படும் களங்கத்தை துடைத்து,அந்த டாலர் தகடுகளை மீட்பதே மீதிப் படம்.

கதை சாதரணமான “அவப்பெயரை நீக்கும்” கதை தான் என்றாலும்,கதை சொல்லப்பட்ட விதத்தில் சொல்லி அடிக்கிறது இந்த A team.

சாதரணமான action படங்களைப் போல வெறும் ஆக்சன் காட்சிகளை மட்டும் நம்பாது, ஹுமர்  கலந்து படத்தை மேலும் விறுவிறுப்பாக தந்து இருப்பது சிறப்பு.இதற்குப் பெரிதும் துணை புரிவது,வசனங்களே !

அதிர வைக்கும் ஆக்சன் காட்சிகள்,வெடிச் சிரிப்பு டயலாக் என்று படத்தை விறுவிறுப்பாக்கி இருந்தாலும்,அது மட்டுமே இப்படத்தின் சிறப்பு அல்ல.அருமையான நடிப்பும்,அதனை விட அருமையான character development உம், படத்தின் ஆகச் சிறப்பு.

அதிரடித் திட்டங்களைத் தீட்டி அதனை நைச்சியமாக செயல்படுத்தும் தலைவன்  ஹன்னிபல்,ஸ்திரீலோலன் பேஸ் ,முரடன் பாஸ்கோ,அரைக் கிறுக்கு முர்டோக் என்று கட்டம் கட்டி அடித்து இருக்கிறார்கள்.

ஆரம்ப இன்ட்ரோ காட்சியின் மூலமே ஒவ்வொருவரின் இயல்புகளை காட்டி இருப்பது அழகு.வேண்டும் என்றே பிடிபட்டு ,அதன் மூலம் பேஸின் இருப்பிடத்தை ஹன்னிபல்  கண்டுபிடிக்கும் போது ஆரம்பிக்கும் பரபர ஆக்சன்,கதையின் இறுதி வரை நீடிக்கிறது.முக்கியமாக,அந்த tank காட்சியும்,அதில் வரும் வசனங்களும் pepper கலந்த babycorn  சுவை.கடைசி சண்டையில் லாஜிக் கிடையாது என்றாலும்,பிரம்மாண்டம் அள்ளுகிறது.அந்த tank சண்டைக் காட்சி காதில் பூ சுற்றும் வேலையே என்றாலும்,விறுவிறுப்பு .

பேசின் முன்னாள் காதலியாக Jessica Biel.பெரிய வேலை ஒன்றும் இல்லை.

ஹன்னிபல் ஆக Liam Neeson.சிறந்த நடிகரான இவர்,தன்னுடைய அலட்டல் இல்லாத,அதே நேரம் ஸ்டைலான நடிப்பால் கவர்கிறார்.சுருட்டை வாயில் வைத்து இவர் சிரிக்கும் பாங்கும்,இவருடைய பஞ்ச் டயலாக்கும் அருமை.

பேஸ் ஆக Bradley Cooper.இவருக்கும் ,இவருடைய முன்னாள் காதலிக்கும் இடையே நடக்கும் உரையாடல் satrie கலாட்டா.பின்னர்,tank சீனில் “what do you got….. “ என்று டாங்கின் machine gun ஐ வைத்து சுட்டுக் கொண்டு செய்யும் அலும்பு,அருமை.

B.A Bosco வாக Quinton Jackson.அதிரடி முரடனாக மட்டுமல்லாது காமெடியிலும் பின்னி இருக்கிறார்.நடுவானில் பல சாகசங்கள் செய்த ரேஞ்சராக இருந்தாலும்,முதல் முறையே முர்டோக் ஹெலிகோப்டர்  ஓட்டும் ‘அழகில்’ பயந்து,அதில் இருந்து முர்டோக்குடனான ஆகாய பயணங்களை தவிர்க்க தவிப்பதும்,ஆகாயப் பயணத்தில் ஒவ்வொரு முறையும்,இவரை மற்றவர்கள் எல்லோரும் சேர்ந்து  மயக்க மருந்து கொடுத்து ‘அழைத்துச்’ செல்வதும் கலாட்டா.

முரடனாக இருந்து ,சிறைவாசத்தில் திருந்த முற்பட்டு பின் பாதியில் வன்முறையை தவிர்க்க நினைக்கும் போதும்,ஆகாயப் பயணங்களின் போதும் (குறிப்பாக,அந்த tank காட்சிகளில் இவரது நடிப்பு…) இவரது நடிப்பு அருமை.கோபத்தில் இவர் உதிர்க்கும் டயலாக்கள் அருமை.

பியேவும்,முர்டோக்கும் சேரும் இடங்களில் எல்லாம் பற்றிக் கொள்கிறது பரபர காமெடி பட்டாசு.

முர்டோக் ஆக Sharlto Copley. The man who steals the show..

அரைக் கிறுக்கு கதாப்பாத்திரத்தில் பின்னிப் பெடலெடுத்து இருக்கிறார்.லியம் நீசனின் இன்ட்ரோவிற்கு இருக்கும் அதே கெத்து,இவருடைய இன்ட்ரோவிற்கும் இருக்கிறது.அந்த ஆரம்ப காட்சிகளில் இவர் அடிக்கும் கூத்தும்,அதனைத் தொடரும்

Mur:“I am a ranger ,baby.”

Face:“I am worried.”

டயலாக்கும் அறுசுவை விருந்து.இவருடைய அருமையான காமெடி நடிப்பிற்கு கை கொடுக்கிறது இவரது டயலாக் டெலிவரி.முக்கியமாக,இவரது ஸ்லாங்.

ஆகாயப் பயணங்களில் வேண்டும் என்றே பாஸ்கோவை சீண்டுவதும்,பின்னர் அவனுக்குப் பிடித்த சாப்பாட்டை செய்து கொடுத்து தாஜா செய்வதும்,ஆரம்ப மற்றும் tank காட்சிகளில் அவர் அடிக்கும் கூத்தும்…. awesome.

நல்ல திரைக்கதை,பரபர ஆக்சன்,அருமையான நடிப்பு,அருமையான ஹுமர்,சிறந்த character development,பக்காவான இயக்கம் என்று இந்தப் படத்தை பார்க்க வேண்டிய காரணங்கள் ஆயிரம் இருக்கின்றன.

A team – Awesome team….

I love it when a good film comes along… :)