My Love (2007) - காதல் படுத்தும் பாடு…

2007 இல் வெளிவந்த கொரியன் படமான இந்த My Love, நான்கு காதல்களையும் ,ஒரு destiny day யையும் பற்றியது.

கைகூடாத காதலினால் தவிக்கும் சே ஜின் (Se Jin),தனது வீட்டு ஜன்னலில் தனது காதலி ஜூ வோன் (Joo Won) பதித்து விட்டுச் சென்ற ஓவிய முத்திரையைக் கண்டவாறே,தனது மனதில் அவள் பதித்துவிட்டுச் சென்ற ஞாபக முத்திரைகளைக் கிளருகிறான்.அழித்துவிடக் கூடாது என்று உறுதிவாங்கப்பட்ட ஓவியத்தின் முன் நின்று,தன்னால் அழித்துவிடவே முடியாத அவளுடைய நினைவுகளை அசை போடுகிறான்.

“காதலும் காற்று போன்றதே.எந்நேரம் எப்படி வீசும் என்று இரண்டிற்கும் தெரியாது “ என்ற கவித்துவமான வசனத்தோடு ஆரம்பிக்கிறது இந்தப் படம்.

இப்போது ஒரு ரயிலில் ஓட்டுனராகப் பணிபுரியும் ஜின்,சில வருடங்களுக்கு முன்,அதே ரயிலில் தனது காதலியை சந்தித்து இருக்கிறான்.அவர்கள் சந்தித்த ரயில்நிலயங்களை எல்லாம் கடந்து செல்லும் அவனால்,அவர்களது சந்திப்புகளைக் கடந்து செல்ல இயலவில்லை.

அயல்நாடு சென்றாலும்,தனது இதயத்தின் ஒரு பாதியை சியோல் நகரில் தொலைத்துச் சென்றவன் ஜின் மன் (Jin-man).அயல்நாடு செல்லும் போது,தனது காதலி கதறிக்கொண்டே “நீ செல்ல வேண்டும் என்பதில் உறுதியாக இருந்தால்,எனது நெஞ்சத்தின் இப்போதைய நிலை போல அல்லாது,பிறர் நெஞ்சங்களை இதப்படுத்து.” என்று சொன்னதற்காகவே “Free hugs” தந்து பிறரின் நெஞ்சங்களில் அன்பை விதைப்பவன் அவன்.

அவனுடைய காதலி,அவர்கள் பிரியும் போது,ஆறு வருடங்களில் நிகழவிருக்கும் முழு சூரிய கிரகணத்தின் போது,மறுபடி தாங்கள் சந்தித்துக் கொள்ள வேண்டும் என்ற கூறிவிட்டுப் பிரிகிறாள்.அதனை எதிர்பார்த்து மறுபடியும் கொரியாவின் சியோல் நகரம் வரும் அவன் புதியதொரு பிரச்சனையை சந்திக்கிறான்.

தனது முந்தைய செல்பேசி எண்ணின் இணைப்பு துண்டிக்கப்பட்டு,அது இப்போது வேறு ஒருவரின் பயன்பாட்டில் உள்ளது என அறியும் அவன்,தனது காதலிக்குத் தெரிந்த ஒரே எண்ணான அதை திரும்பப் பெற விழைகிறான்.

ஆனால் செல்பேசி நிறுவனத்தினர் கைவிரிக்கவே,அந்த எண்ணை தற்போது உபயோகித்துக் கொண்டு இருக்கும் சூ ஜியோங்(Soo Jyeong) ஐ சந்திக்கச் செல்கிறான்.

முழு சூரிய கிரகணத்தை முன்னிட்டு ஒரு பெரிய கொண்டாட்டத்தை ஏற்பாடு செய்து,அதனை தான் வேலை பார்க்கும் கம்பெனியின் மூலம் நடந்த நினைக்கும் அவளும்,காதலின் பிடியில் ஆழ்ந்து உழல்பவளே!

தன்னுடன் வேலை பார்க்கும் கிம் என்பவனைக் காதலிக்கிறாள் ஜியோங்.ஏற்கனவே காதல் மணம் புரிந்து,மனைவியை இழந்து தவிக்கும் கிம் ,அவளை ஏற்கத் தயாராயில்லை.இறந்து போன தனது மனைவியின் நினைவில் ஆழ்ந்து,ஜுங்கின் காதலையும் இறக்கச் செய்யும் செயல்களில் ஈடுபடுகிறான் கிம்.ஜுங்கை ஏற்கத் துணியாத அவன்,அவளை தன்னிடம் இருந்து தூரப்படுத்தவே விழைகிறான்.

தூரத்தில் இருந்து அவதிப்படும் ஜுங்,தூரத்தில் இருந்து வந்திருக்கும் ஜின்னுக்கு உதவ விளைகிறாள்.

காலேஜில் படித்துக்கொண்டு இருக்கும் சோ ஹியோன் (So Hyeon) ,உடன் பயிலும் ஜி வூ (Ji Woo) வை விரும்புகிறாள்.கொரியக் கலாச்சாரத்தில் கலந்து இருக்கும்,விழாக்களில் டிரிங்க்ஸ் சாப்பிடும் பழக்கம்,மது அருந்தத் தெரியாத ஹியோனிற்கு ஒரு தொல்லையாகவே இருந்து இருக்கிறது.இதனை நிவர்த்தி செய்யும் பொருட்டு,இதனைக் கற்றுக்கொள்ளவும் ,வூவுடன் நெருக்கமாகவும் அவனை நெருங்கி அவனது உதவியைக் கோருகிறாள் ஹியோன்.

நாளடைவில் அவனுடன் நெருக்கமாகும் அவள்,அவனுக்கு நல்லதொரு தோழியும் ஆகிறாள்.வூ தனது முன்னாள் காதலியின் நினைவில் தவிப்பதைக் காணும் அவள்,அருகில் இருந்தும் எட்ட இயலாத வானவில்லைப் போன்ற தன் காதலை எண்ணி மருகுகிறாள்.

இந்த நால்வரின் கதைகளையும்,அந்த முழு சூரிய கிரகண நாளை நோக்கிப் பயணிக்கும் இவர்களது காதல்களையும் பற்றிய அழகிய தொகுப்பே இந்தக் கதை.

எப்போதும் கனவு உலகில் வாழ்ந்த தனது முன்னாள் காதலியை உணரும் பொருட்டே தாங்கள் பயணம் செய்த ரயிலில் ஓட்டுனராக பணிபுரியும் சே ஜின்,அருகே இருந்தாலும் எட்டாத தூரத்தில் இருக்கும் காதலைக் கண்டு மருகும் ஜியோங் மற்றும் ஹியோன் ,தொலை தூரத்தில் இருந்து வந்து தொலைந்த காதலை தேட விளையும் ஜின் என இவர்களை எல்லாம் துன்புறுத்தும் காதல்,இவர்களை அந்த குறிப்பிட்ட நாளை நோக்கி தேடல்,சந்தோசம்,வருத்தம்,சுகநினைவு,எதிர்பார்ப்பு என்ற கலவையான உணர்ச்சிகளின் துணையோடு நடை போட வைக்கிறது.

கிம் தன்னை மறுத்து வெளியே அனுப்பிய பின்,அவனது வீட்டில் இருந்து அழுதுகொண்டே வரும் ஜியோங், “வானம் இன்று அருமையாக இருக்கிறது” என்று கூறிக்கொண்டு,தனக்குத்தானே சமாதானப்படுத்திக் கொள்ள முயல்வதும்,இயலாமல் போனதும் “I need a drink” என்று சொல்லி அடுத்த காரணத்தை தேடுவதும் நெஞ்சைப் பிழியும் காட்சி.

பூட்டிய ரயிலினுள் தூங்கிக் கொண்டிருக்கும் ஜூ வை நோக்கி நகரும் கரும்புகையோடு சேர்ந்தே நகரும் மரணமும்,

எப்போதும் கற்பனையில் மூழ்கி இருக்கும் காதலியைக் குறைசொல்லும் சே ஜின்,பின்னர் கற்பனையிலேயே அவளோடு வாழ்வதும்,

தன் காதலைத் தேடி ரணப்பட்ட மனதோடு சுற்றும் ஜின்,பிறர் நெஞ்சங்களை இதப்படுத்த முயல்வதும்,கடைசிக் காட்சியில் ,அந்தத் திருவிழாவில் காதலின் வலியோடு பிறருக்கு அன்பின் இதத்தை அளிப்பதும் நெஞ்சை நெகிழ்த்தும்.

காதல் என்பது என்ன?எதனால் இது வருகிறது?கோடானு கோடி மக்கள் இருக்கும் இந்த பூமியிலே குறிப்பாக ஒருவருக்காக உயிரையும் கொடுக்கத் துணியும் அளவுக்கு மாயம் செய்யும் அதன் மந்திரம் தான் என்ன?காதலர்களின் நெஞ்சில் மென்சோகத்தையும்,மெல்லிய சந்தோஷ ரேகயயையும் படரச் செய்யும் காதலின் கரங்கள் எப்பேர்ப்பட்டவை ?

ஜியோங்கிடம் பேசும் போது ஜின் சொல்லுவான், “வானத்தில் எத்தனையோ நட்சத்திரங்கள் இருந்தாலும் அவை நிலை மாறிக் கொண்டே இருக்கும்.ஆனால் துருவ நட்சத்திரம்(North star) அவ்வாறானது அல்ல.அது எப்போதும் ஒரே இடத்தில் தான் இருக்கும்.

நாம் கொடுத்து வைத்தவர்கள்.நம் உயிருக்குயிரான நபர்கள் நமது நெஞ்சில் அந்த துருவனைப் போல நிலை கொண்டு இருக்கிறார்கள்” என்று.

அவன் சொல்ல வந்தது, ‘எப்போதும் மாறிக்கொண்டு இருக்கும் வாழ்க்கையில்,மாறாத அன்பை அனுபவிக்கப் பெற்றவர்கள் காதலர்கள்’ என்பதாகவே இருக்கும் என்று தோன்றுகிறது.காதலின் கரங்கள் அத்தகையதே...

My Love – காதலர்களுக்கு மட்டுமல்லாது,அன்பைத் துதிப்பவர்களுக்கும்...